Revelation of John 10
Ensel ne maifa gelemuta
1Ne aria naap ikok ensel kekanowa oko owow iinan-pa oreya urufam. Maa ipisia-ke muep feekiya orok ne ikiwosa iwamerena-ke saawirinowap ikua. Ona miira ama saarik wilinem-ikua ne kepura-ke mukuna wiliniya naap arem-ikua. 2Ne maifa gelemuta iiriw wasiep ikua nain tiinep wapena-pa opap ikua. Orop kepur akena ifera akupak ne asowa miiwa akupap iimarep ikok kerew akena farek, laiyon aluiya naap. Fareya aapereka-ke paranowa ikur okaiwi-pa erup aremi opora maek. 4Aapereka paranowa weeserep ikaeya, aria yo o maek nain wiar siisimekam naep onam-ikemkun opora-ko iinan-pa efa farek, “Oi, nain me siisimowa-ke, nena kema-pa kokot nefar ikainok!”5Aria naap ikemkun ensel iinan-pa orop ifera ne miiwa-pa iimarep ikua nain-ke wapen akena siikami, Iinan Mua Maneka anane ikaiya nain, aria iinan maa muutitik ne miiwa maa muutitik onomakek nain unuma unufami maek, “Maken akena maiyem, epa weeserek. Nainiw wia arewowa me pepek! 7Ne ensel murarow akena nain puuw fuurinon-na Mua Maneka eena maa mauwa ona kema-pa wiar ikua nain me onowa ikua nain iiwawun welawinon, iiriw ona profet wia maakek naap.”
8Naap ikok opora iiriw iinan-pa efa farek nain kiiriw nainiw efa faremi maek, “Ensel iiriw orop ifera ne miiwa-pa iimarep ikua nain wiar ikiwep maifa tiinep ikua nain wiar aawe.” 9Naap efa maakeya yo ekap ensel nain maakemkun efa maakek, “Aawep enep furewe. Opaimika-pa aaya saarik nefar afililinon ne orop uroma-pa nefar masialinon.” 10Aria maifa nain wapena-pa wiar aawep enem-na naap arek, opaimika-pa aaya saarik efar afililak ne uroma oreya masia furewam. 11Ne efa maakek, “Wi miiw unowa mua maa mauwa-ke ikoka wiar imenarinon nain kiiriw nainiw ariman wuami wia maake, wi mua mia sira-sira ne opora aakunowa sira-sira ne owow ononer ne wi owow saria unowa pun.”
Copyright information for
MHL